Gure ametsak gauzatuz, haien amesgaiztoak sortu
Eta, halako batean, berriak izutu gintuen “Ba al dakik/n? Mayor Garzonek Zumalabekoak, ABK-koak eta Bai Euskal Herriariarikoak atxilotu-bahitu ditik/n, ETAkide eta laguntzaile izateagatik, desobedientzia zibila bultzatzeagatik eta gizarte eta herri mugimenduen koorinazioa, elkarlana eta lana sustatzeagatik”.
Harridura gainditu ezinik, geure buruari galdetzen diogu ez ote diren Garzon eta Oreja taldearen buru berriak, horiek baitira azkenaldian ETAkide karnetak etengabe banatzen ari direnak honi eta hari, eta, are gehiago, komando berriak eratzen dituztenak (politikoa, desobedientziaren aldekoa, hezkuntza arlokoa… baita “muszaleena” ere). Atxilotutako guztien aurpegiak eta haiei buruzko oroitzapenak datozkigu gogora: koordinazio, eztabaida eta elkartzeko sareak sortzeko elkarrekin egindako lana, baita Zumalabe sortu baino lehenago ere; autodeterminaziorako bidean gizartearen partehartzea utopiko edo inozotzat jo edo susmoak hartuta aritzen direnen ulertu ezina; desobedientzia zibila hedatu, zehaztu eta indartzeko ahaleginean emandako hitzaldiak eta mahi-inguruak; milioi askoko dirutza bati uko eginda, dirutza hori gizarte mugimenduen lanerako uzten duenaren koherentzia eta hori horrela eginda gartzeleratzen dutena. Horrekin guztiarekin batera barru-barrutik amorru bizia ernetzen zaigu pertsona horiek bizi duten egoera gogoratzean, baina baita irribarre adarjotzailea ere geure aurpegietan, argi eta garbi baitugu ahalegin horiek guztiek euren emaitza eman dutela eta horixe bera da, hain zuzen ere, Estatu terrorista eta poliziaz betetako honen arduradunak beldurtu, beren onetik atera eta asaldatzen duena.
Astiro-astiro aztertzen badugu, Zumalabe sortu zenetik urte gutxi igaro badira ere, urrats garrantzitsu eta sendoak eman ditugula ikusiko dugu. Hainbat aldiz elkarrekin eztabaidatu, desadostasunak eta adostasunak azaldu, hitz egin eta elkartzeko gai izan gara euskal giza-elkarte erabat ezberdinetako talde asko. Beti eskatutako eta orain dela gutxi lortutako “Mugimenduen gida” argitaratu dugu. Lan taldeak bultzatu dira, besteak beste Desobedientziarena eta horrek ideiak eta kontzeptuak indartzen eta lanerako proposamen serioak eta zehatzak egiten lagundu digu. Aspaldidanik pentsatutako ideia egia bihurtu da: gure jarduerak eta ekitaldiak ezagutu, koordinatu eta adosteko leku bat izan dugu, hitz honek jasotzen dituen FITE aldizkaria bera.
Azken finean, oinarri sendo batzuk ezarri dira, euskal gizarteak berak bere etorkizuna erabaki dezan. Eta horrek haien beldurra eragin du, baita haien alderik zigortzaile eta faszistena erakutsi ere, jakin badakitelako sistemaren oinarri-oinarrietan jarritako lehergailu geldiezin bat izan litekeela.
Horregatik guztiagatik bidea argi eta garbi dagoela uste dugu. Hartutako lan ildoetatik segitu behar dugu. Gainera, gure lagunei egin diezaiekegun elkartasun-adierazpen onena dela pentsatzen dugu eta, zalantzarik gabe, haiek nahi dutena. Indar dezagun Herria Mugi!. Bultza ditzagun taillerak eta eztabaidak!. Eta segi dezagun elkarrekin egindako lanei aukera ematen dieten kanpainak eta ekintzak eratzen, euskal gizarteak bere etorkizuna erabakitzeko gaitasuna eta aukera izan arte.
Colectivo Gasteizkoak
Fite, Fundación Zumalabe, 17-12-1995
